Feeds:
પોસ્ટો
ટિપ્પણીઓ

‘આરઝુ’

અમારા પાગલ દિલને એક જ ધરપત અમારી છે.

અમે જાતે જ નોતરેલી આ કયામત અમારી છે.

 ચાંદને શું ખબર કોઈ ચાતકે સમાવ્યો સિનામાં તેને,

લગભગ એ ચાતક જેવી જ હાલત અમારી છે.

 એમના દિલને કોઇ ખૂણે, અમે હશુ કે નહી, ખબર  નથી,

માત્ર એમની જ કરેલી, માત્ર ઇબાદત અમારી છે.

 દોષ નથી કશો પણ એમાં, એમના દિલનો,

અમારા દિલને તોડનારી તો આ કરવત અમારી છે.

 ‘આરઝુ’  અમને એક જ મળે કબરને  એમના બે આંસુ,

પછી તો બસ, એ અશ્રુવનમાં જ જન્નત અમારી છે.

રાજેશ જોશી ‘આરઝુ’

 

(Holi-2010…                            …Dubai Creek Park)

કોઈ આછેરા રંગે રંગાયા.
તો કોઈ ઘેરા રંગે રંગાયા.

રંગાય જવાની છે મોસમ,
દરેક ચહેરા રંગે રંગાયા.

પાનખરને પણ રંગ હોય,
છો આજ હરા રંગે રંગાયા.

અશ્રુથી ચુકવ્યા છે દામ,
બહુ મોંઘેરા રંગે રંગાયા.

ઓઢી લીધુ છે સ્વેત વસ્ત્ર,
વિશ્રાંત ગહેરા રંગે રંગાયા.

આતમનો ક્યો રંગ ‘આરઝુ’?
અમે તો અનેરા રંગે રંગાયા.

રાજેશ જોશી ‘આરઝુ’

(Holi-2011…                       …Mumzar Park, Dubai)

પરપોટા

ક્ષણમાં તુટી જાય પરપોટા.

પળમાં ફુટી જાય પરપોટા.

જગ-ચિત્ર તો સપ્તરંગીલુ,

રંગમાં ડુબી જાય પરપોટા.

ફુલની કોમળતા જરા સ્પર્શે,

ફુલ પર ઉગી જાય પરપોટા.

કિસ્મતની ફૂંક વધારે લાગે,

અહ્‌મથી ફુલી જાય પરપોટા.

સત્‌ની જો એને હવા લાગી,

ઉર્ધ્વ ઉડી જાય પરપોટા.

અંદર આકાશ, બહાર આકાશ.

આકાશમાં ભળી જાય પરપોટા.

રાજેશ જોશી ‘આરઝુ’

બાળપણને એકાંત સાલે ‘ને તું યાદ આવે માં!
દાદિમાં ઘી-ખિચડી આલે ‘ને તું યાદ આવે માં!

ઉચ્ચ જીવન આપવા, એક્ત્રીસે ગઈ તુ ભણવા,
અઠવાડિયે એક્લો મૂકીને ચાલે ‘ને તું યાદ આવે માં!

ભવિષ્ય ઉજ્વળ બનાવવા, છાત્રાલયે મોક્લ્યો,
બસ-સ્ટેન્ડે ગામની બસ આવે ‘ને તું યાદ આવે માં!

આજીવિકા કમાવા, અતરિયાળ કામે ગયો,
ગલગોટાના ફૂલ સહેજ હાલે ‘ને તું યાદ આવે માં!

પરણાવીને પ્રેમથી પરદેશ વળાવ્યો તેં મને,
પૂત્ર મારો આંગળી જાલે ‘ને તું યાદ આવે માં!

આજે તું નથી છત્તાય છે મારા રોમરોમમાં,
મૌન સન્નાટો બાથમાં ઘાલે ‘ને તું યાદ આવે માં!

રાજેશ જોશી “આરઝુ”

સમર્પણ

દુનિયામાં થી પ્રેમને કોઈ ભાગાડી દેજો.
નહિંતર આંસુમાં ચહેરો ડુબાડી દેજો.
 
ફનાગીરીની તૈયારી હોય તો જ પગ મુકજો,
નહિંતર અત્યારે જ મેદાન છોડી દેજો,
 
‘તુ’ ‘ને ‘હું’ના ભેદભાવ ત્યાં હોતા નથી,
સ્નેહનાં તાંતણે સમગ્રને જોડી દેજો.
 
એકમાં સમગ્ર ‘ને સમગ્રમાં એક જ બિંબાય,
પછી કાચના નકામા દર્પણને ફોડી દેજો.
 
સમર્પણનુ જ બીજુ નામ પ્રેમ છે ‘આરઝુ’
સ્વાર્થને સદાય ખીંટીએ ખોડી દેજો.
 
રાજેશ જોશી “આરઝુ”

બધુ જ સનાતન છે કશુ ગૌણ નથી.
બધુ જ નક્કર છે ક્યાંય ભૌણ નથી.

જન્મી શકે જેના થકી ઇશ્વર અહી,
સંબંધએ કંઇ સાવ યૌન નથી.

બંધન તો મુક્તિનુ યે હોઇ શકે,
મોક્ષ પણ શું સુક્ષ્મ દૌડ નથી?

શુન્યમાં સંભળાય સ્વર અનાગતનો,
મૌન જે કંઇ લાગે છે એ મૌન નથી.

કંઇક તરફડીને મરી જાય, શબ્દદેહ રહિ જાય,
‘આરઝુ’ અમને કવિ થવાનો ધૌળ નથી.

રાજેશ જોશી “આરઝુ”

ઓસ્ટ્રેલિયા થી પ્રસિધ્ધ થતા દ્વિ-માસિક ‘માતૃભાષા’ ના જૂન-૨૦૧૦ના અંક માં પ્રસિધ્ધ થયેલ કૃતિ.

‘માતૃભાષા’ ની લિન્કઃ http://www.gujaratilexicon.com/index.php?action=downloadMatrubhasha

આજ થી પંદરેક વરસ પહેલા ‘ગુજરાત સમાચાર’ માં પ્રસિધ્ધ થયેલી આ કવિતા અહિં વતનથી દૂર બેસીને વાંચતી વખતે એટલી જ તાજી લાગે છે. જેટલી એ લખાઇ ત્યારે લાગતી હતી. આપ સૌના માટે અહિં મૂકુ છુ.

દોસ્તીને કોઇ સુંવાળી ન બનાવશો.

લાગણીને કોઇ હુંફાળી ન બનાવશો.

હંમેશા નજદિકી શક્ય નથી ક્યારેય,

દૂરીને કોઈ બેબાકળી ન બનાવશો.

કિસ્મત કેવા ખેલ કરાવશે કોને ખબર,

ધડકન કોઇ ઉતાવળી ન બનાવશો.

અંતર તો છે આપ્યુ તે ધબવાનુ જ,

અંતરને વરસતી વાદળી ન બનાવશો.

‘આરઝુ’ અમે તો માત્ર રાહિ અવલ્લ મંજિલના,

અમને કોઇ હૈયાની હાંસળી ન બનાવશો.

રાજેશ જોશી “આરઝુ”

Photo at Dubai Crick Park

Photo : Dubai Creek Park


Share/Bookmark